ഫിന്നിഷ് കമ്പനിയായ എച്എംഡി ഗ്ലോബലിന് കീഴിൽ പ്രവർത്തിക്കുന്ന നോക്കിയ ബ്രാൻഡ് പുതിയ സ്മാർട്ട്ഫോൺ ലോഞ്ച് ചെയ്യാനൊരുങ്ങുന്നു. ഈ വർഷത്തിന്റെ തുടക്കത്തിൽ നോക്കിയ പ്രഖ്യാപിച്ച ജി സീരീസ് ഫോണുകളിൽ ആദ്യ മോഡലായി നോക്കിയ G20 ആണ് ഉടൻ വില്പനക്കെത്തുക. മിഡ്-റേഞ്ച് സ്മാർട്ട്ഫോൺ ശ്രേണിയിലെ വിലക്കുറവുള്ള സ്മാർട്ട്ഫോൺ ആയി വില്പനക്കെത്തുന്ന നോക്കിയ G20യുടെ പ്രീ-ബുക്കിങ് ജൂലൈ 7ന് ഉച്ചയ്ക്ക് 12 മുതൽ ആരംഭിക്കും എന്ന് ആമസോൺ വെബ്‌സൈറ്റിലെ ബാനർ വെളിപ്പെടുത്തുന്നു. നോക്കിയ G20യ്ക്ക് 12,999 രൂപയാണ് വില എന്നും ബാനറിൽ പ്രദർശിപ്പിച്ചിരുന്നു എങ്കിലും അൽപ സമയത്തിന് ശേഷം വിലവിവരം ഒഴിവാക്കി.
4 ജിബി റാമുള്ള ഒരൊറ്റ പതിപ്പിലാവും നോക്കിയ G20 വില്പനക്കെത്തുക. നൈറ്റ്, ഗ്ലേസിയർ എന്നിവയാവും കളറുകൾ.സ്റ്റോക്ക് ആൻഡ്രോയിഡ് 11 ഓപ്പറേറ്റിംഗ് സിസ്റ്റത്തിൽ പ്രവർത്തിക്കുന്ന പുത്തൻ നോക്കിയ ഫോണിന് രണ്ട് വർഷത്തെ ആൻഡ്രോയിഡ് അപ്‌ഗ്രേഡുകൾ ലഭിക്കുമെന്ന് കമ്പനി ഉറപ്പ് നൽകുന്നു. 20:9 ആസ്പെക്ട് റേഷ്യോയുള്ള 6.5 ഇഞ്ച് എച്ച്ഡി + ഡിസ്‌പ്ലേയാണ് നോക്കിയ G20യ്ക്ക്. മീഡിയടെക് ഹീലിയോ ജി 25 SoC ആണ് സ്മാർട്ട്‌ഫോണിന്റെ കരുത്ത്. 128 ജിബി വരെ ഇന്റെർണൽ മെമ്മറി പ്രതീക്ഷിക്കാം. 10W ഫാസ്റ്റ് ചാർജിംഗ് പിന്തുണയുള്ള 5,050mAh ബാറ്ററിയാണ് നോക്കിയ G20യിൽ ഇടം പിടിക്കുക.
