കമ്പനിയുടെ ഇതുവരെയുള്ള ഇരുചക്രവാഹന നിർമാണം കാൽ ലക്ഷം യൂണിറ്റ് കവിഞ്ഞതായി വൈദ്യുത ഇരുചക്രവാഹന നിർമാതാക്കളായ എഥർ എനർജി. തമിഴ്നാട്ടിലെ ഹൊസൂർ ശാലയിൽ നിന്നാണ് 25,000–ാമത് 450 എക്സ് പുറത്തെത്തിയത്.2020 ജനുവരിയിൽ ഉൽപ്പാദനം ആരംഭിച്ച എഥർ എനർജി, രണ്ടു വർഷത്തോളമെടുത്താണ് ഈ നേട്ടം സ്വന്തമാക്കിയത്. സ്റ്റാർട് അപ്പുകളും പുത്തൻ സംരംഭകരും അരങ്ങുവാഴുന്ന ഇന്ത്യൻ വൈദ്യുത ഇരുചക്രവാഹന വിപണിയിൽ ശ്രദ്ധേയ സാന്നിധ്യമാണ് എഥറിന്റെ ‘450 എക്സ്’.നാലു വ്യത്യസ്ത റൈഡിങ് മോഡ് സഹിതമാണ് ‘450 എക്സ്’ എത്തുന്നത്: ഇകോ, റൈഡ്, സ്പോർട്, വാർപ്. ഇ സ്കൂട്ടറിന്റെ മോട്ടോർ സൃഷ്ടിക്കുന്ന 26 എൻ എം ടോർക്കും പൂർണമായും വിനിയോഗിക്കാൻ അനുവദിക്കുന്നതാണ് വാർപ് മോഡ്.തികഞ്ഞ കാഴ്ചപ്പകിട്ടോടെയും രൂപകൽപ്പനയിലെ മികവോടെയുമാണ് എഥറിന്റെ ‘450 എക്സ്’ എത്തുന്നത്. ഇ സ്കൂട്ടറിനു കരുത്തേകുന്നത് 2.9 കിലോവാട്ട് അവർ ലിതിയം അയോൺ ബാറ്ററി പായ്ക്കാണ്; എഥർ ‘450 എക്സി’ലെ വൈദ്യുത മോട്ടോർ സൃഷ്ടിക്കുക എട്ടു ബി എച്ച് പിയോളം കരുത്തും 26 എൻ എം വരെ ടോർക്കുമാണ്. മുൻഗാമിയായ എഥർ 450 ഇ സ്കൂട്ടറിനെ അപേക്ഷിച്ച് ‘450 എക്സി’ന്റെ പ്രകടനക്ഷമതയിൽ കാര്യമായ പുരോഗതിയുണ്ട്.വരുംനാളുകളിൽ ഇ സ്കൂട്ടർ ഉൽപ്പാദനം ഗണ്യമായി ഉയർത്താനും എഥർ എനർജിക്കു പദ്ധതിയുണ്ട്. ഘട്ടംഘട്ടമായി പ്രതിവർഷ ഉൽപ്പാദനം നാലു ലക്ഷം യൂണിറ്റായും മൂന്നു വർഷത്തിനുള്ളിൽ വാർഷിക ഉൽപ്പാദനം 10 ലക്ഷം യൂണിറ്റായും ഉയർത്താനാണു കമ്പനി ലക്ഷ്യമിടുന്നത്.
