ആക്സെസ് 125 എന്ന ഒരു മോഡലിലൂടെ മാത്രം ഇന്ത്യയിലെ സ്കൂട്ടർ ശ്രേണിയിൽ ശക്തമായ സാന്നിധ്യമായി മാറിയ ഇരുചക്ര വാഹന നിർമാതാക്കളാണ് സുസുക്കി. സ്കൂട്ടർ നിര വിപുലമാക്കുന്നതിന്റെ ഭാഗമായി 125 സി.സി. സെഗ്മെന്റിൽ പുതിയ ഒരു മോഡൽ കൂടി എത്തിച്ചിരിക്കുകയാണ് ഈ ഇരുചക്ര വാഹന നിർമാതാക്കൾ. അവെനിസ് 125 എന്ന് പേരിൽ എത്തിയിട്ടുള്ള പുതിയ മോഡലിന് 86,700 രൂപ മുതലാണ് എക്സ്ഷോറും വില.പുതുതലമുറ ഉപയോക്താക്കളെ ആകർഷിക്കുന്നതിന് എത്തിയിട്ടുള്ള അവെനിസ്, ടി.വി.എസ്. എൻടോർക്ക്, ഹീറോ മാസ്ട്രോ എഡ്ജ്, ഹോണ്ട ഗ്രാസിയ, അപ്രീലിയ 125 തുടങ്ങി ഈ ശ്രേണിയിൽ കരുത്തൻ സാന്നിധ്യമായ സ്കൂട്ടറുകളുമായായിരിക്കും ഏറ്റുമുട്ടുക.125 സി.സി. ശ്രേണിയിൽ സുസുക്കി എത്തിച്ചിട്ടുള്ള ആക്സെസ്, ബെർഗ്മാൻ സ്ട്രീറ്റ് തുടങ്ങിയ വാഹനങ്ങൾക്കൊപ്പമായിരിക്കും അവെനിസും വിൽപ്പനയ്ക്ക് എത്തുക. സ്പോർട്ടി ഭാവം ഉൾക്കൊണ്ടാണ് ഈ വാഹനവും എത്തിയിരിക്കുന്നത്. മസ്കൂലർ ഭാവത്തിലുള്ള ഫ്രണ്ട് ഏപ്രൺ, എയർ ഇൻടേക്കുകൾ നൽകിയുള്ള ട്രെപ്സോയിഡൽ ഹെഡ്ലാമ്പ്, ഹാൻഡിൽ ബാർ കൗളിൽ നൽകിയിട്ടുള്ള ഇന്റിക്കേറ്റർ, വലിപ്പം കുറഞ്ഞ ഫ്ളൈ സ്ക്രീൻ, സ്റ്റൈലിഷായ ഗ്രാഫിക്സുകൾ, എൽ.ഇ.ഡി. ടെയ്ൽലാമ്പ്, ബൈക്കിന് സമാനമായ ഇന്റിക്കേറ്റർ എന്നിവയാണ് ഈ സ്കൂട്ടറിന് രൂപഭംഗി നൽകുന്നത്.പുതുതലമുറ സ്കൂട്ടറുകൾക്ക് സമാനമായ കണക്ടഡ് സ്കൂട്ടറാണ് അവെനിസും എത്തിയിട്ടുള്ളത്. ഫുൾ ഡിജിറ്റൽ ഇൻസ്ട്രുമെന്റ് ക്ലെസ്റ്ററാണ് ഇതിലുള്ളത്. ബ്ലുടൂത്തിന്റെ സഹായത്തോടെ സുസുക്കി റൈഡ് കണക്ട് ഇൻസ്ട്രുമെന്റ് ക്ലെസ്റ്ററുമായി ബന്ധിപ്പിക്കാൻ സാധിക്കും. ഇതിലൂടെ ടേൺ-ബൈ-ടേൺ നാവിഗേഷൻ, മെസേജ് ആൻഡ് കോൾ അലേർട്ട് എന്നിവയും ലഭ്യമാക്കും. എക്സ്റ്റേണൽ ഫ്യുവൽ ക്യാപ്, യു.എസ്.ബി. ചാർജർ തുടങ്ങിയവയും ഇതിലുണ്ട്.125 സി.സി. സിംഗിൾ സിലിണ്ടർ എയർ കൂൾഡ് ഫ്യുവൽ ഇഞ്ചക്ടഡ് എൻജിനാണ് ഈ വാഹനത്തിൽ പ്രവർത്തിക്കുന്നത്. ഇത് 8.6 ബി.എച്ച്.പി. പവറും 10 എൻ.എം. ടോർക്കുമാണ് ഉത്പാദിപ്പിക്കുന്നത്.
