ഇന്ത്യൻ വിപണിയിലെ താരമായിരുന്ന മൈക്രോമാക്സ് കഴിഞ്ഞ വർഷം നവംബറിലാണ് ഇൻ എന്ന് പേരുള്ള സബ്-ബ്രാൻഡുമായി തിരിച്ചുവരവ് നടത്തിയത്. ഇൻ 1b, ഇൻ നോട്ട് 1 എന്നീ ഫോണുകളാണ് മൈക്രോമാക്സ് അവതരിപ്പിച്ചത്. ഇതിൽ ഇൻ 1bയുടെ പിൻഗാമി ഇൻ 2bയെ ഈ മാസം 30ന് (വെള്ളിയാഴ്ച) മൈക്രോമാക്സ് വില്പനക്കെത്തിക്കും.ലോഞ്ചിന് മുൻപായി ഇൻ 2b സംബന്ധിച്ച ചില വിവരങ്ങളും ചിത്രവും ഫ്ലിപ്പ്കാർട്ടിൽ പോസ്റ്റ് ചെയ്തിട്ടുണ്ട്.ഫ്ലിപ്കാർട്ട്, മൈക്രോമാക്സ്ഇൻഫോ.കോം എന്നീ വെബ്‌സൈറ്റുകളിലൂടെ വില്പനക്കെത്തുന്ന മൈക്രോമാക്സ് ഇൻ 2b, കറുപ്പ്, നീല, പച്ച എന്നീ മൂന്ന് കളർ ഓപ്ഷനുകളിലാണ് ലഭ്യമാവുക.
വാട്ടർ ഡ്രോപ്പ് ശൈലിയിലുള്ള നോച്ച് ഡിസ്‌പ്ലേയും പുറകിൽ മുകളിലായി ഇടത് മൂലയിൽ ചതുരാകൃതിയിലുള്ള ക്യാമറ മൊഡ്യൂളിനുള്ളിൽ സ്ഥാപിച്ചിരിക്കുന്ന ഇരട്ട പിൻ ക്യാമറ സജ്ജീകരണവുമായാണ് മൈക്രോമാക്സ് ഇൻ 2b വില്പനക്കെത്തുക.സ്‌ക്രീനിന്റെ വലതുവശത്ത് സ്ഥിതിചെയ്യുന്ന വോളിയവും പവർ ബട്ടണുകളും ഉള്ള പിൻ ഫിംഗർപ്രിന്റ് സെൻസർ ഇൻ 2bയിലുണ്ടെന്ന് ചിത്രങ്ങൾ വെളിപ്പെടുത്തുന്നു. ഹൈപവർ ചിപ്സെറ്റ് ആയിരിക്കും പുത്തൻ ഫോണിന് എന്നും മൈക്രോമാക്സ് പ്രഖ്യാപിച്ചിട്ടുണ്ട്.160 മണിക്കൂർ വരെ മ്യൂസിക് പ്ലേബാക്ക്, 20 മണിക്കൂർ വെബ് ബ്രൗസിംഗ്, 15 മണിക്കൂർ വരെ വീഡിയോ സ്ട്രീമിംഗ്, 50 മണിക്കൂർ ടോക്ക് ടൈം എന്നിവ വാഗ്ദാനം ചെയ്യുന്ന 5,000 എംഎഎച്ച് ബാറ്ററിയും ഫോണിനുണ്ടാകും എന്ന് മൈക്രോമാക്സ് വെളിപ്പെടുത്തിയിട്ടുണ്ട്. 2 ജിബി, 4 ജിബി റാം ഓപ്ഷനുകളിലാണ് ഇൻ 2b വിപണിയിലെത്തുക എന്നാണ് വിവരം.കഴിഞ്ഞ വർഷം ഇൻ 1b വിപണിയിലെത്തിയപ്പോൾ 6,999 രൂപയായിരുന്ന വില. മൈക്രോമാക്സ് ഇൻ 2bയ്ക്ക് വില അല്പം വർദ്ധിക്കാനാണ് സാദ്ധ്യത.
