തണ്ടർബേഡ് എന്ന ക്രൂയിസർ ബൈക്കിന് പകരക്കാരനായി ഇന്ത്യയിൽ എത്തിയ റോയൽ എൻഫീൽഡ് ബൈക്കാണ് മീറ്റിയോർ 350. കിടിലൻ ലുക്കിനൊപ്പം മികച്ച ഫീച്ചറുകളുമായെത്തിയ പുതിയ ക്രൂയിസർ ബൈക്കിനെ ഇന്ത്യയിലെയും വിദേശത്തേയും ബൈക്ക് പ്രേമികൾ ഏറ്റെടുക്കുകയായിരുന്നു. പല വിദേശ രാജ്യങ്ങളിലും സാന്നിധ്യമാകുന്ന ഈ ബൈക്ക് ഇന്ത്യയിലും തിളക്കമാർന്ന പ്രകടനം കാഴ്ച വയ്ക്കുകയാണ്.2020 നവംബറിലാണ് ഈ ബൈക്ക് വിപണിയിൽ എത്തുന്നത്. അവതരിപ്പിച്ച് 25 ദിവസത്തിനുള്ളിൽ 7000 യൂണിറ്റ് വിറ്റഴിച്ചതായി റോയൽ എൻഫീൽഡ് റിപ്പോർട്ട് ചെയ്തിരുന്നു.
ഈ നേട്ടത്തെ കവച്ചുവയ്ക്കുന്ന വിൽപ്പനയാണ് മാർച്ച് മാസത്തിൽ ലഭിച്ചിട്ടുള്ളത്. 2021 മാർച്ച് മാസത്തിൽ മാത്രം മീറ്റിയോറിന്റെ 10,596 യൂണിറ്റാണ് റോയൽ എൻഫീൽഡ് വിറ്റഴിച്ചിട്ടുള്ളത്.ഫയർബോൾ, സ്റ്റെല്ലാർ, സൂപ്പർനോവ എന്നീ മൂന്ന് വേരിയന്റുകളിലാണ് മീറ്റിയോർ 350 എത്തിയിട്ടുള്ളത്. റോയൽ എൻഫീൽഡിന്റെ പുതിയ ഡ്യുവൽ ഡൗൺട്യൂബ് ഫ്രെയിമിലാണ് ഈ വാഹനം ഒരുങ്ങിയിരിക്കുന്നത്. റോയൽ എൻഫീൽഡിന്റെ യു.കെ. ടെക് സെന്റർ ടീമും ഇന്ത്യയിലെ റിസർച്ച് ആൻഡ് ഡെവലപ്പ്മെന്റ് വിഭാഗവും സംയുക്തമായാണ് ഈ വാഹനം ഒരുക്കിയിരിക്കുന്നത്.കൂടുതൽ മെച്ചപ്പെട്ട പ്രകടനം നൽകുന്നതിനായി പ്രൈമറി ബാലൻസർ ഷാഫ്റ്റുള്ള 349 സിസി സിംഗിൾ സിലിണ്ടർ ഫോർ സ്ട്രോക്ക് എസ്.ഒ.എച്ച്.സി എൻജിനാണ് മീറ്റിയോറിൽ പ്രവർത്തിക്കുന്നത്. ഇത് 20.2 ബി.എച്ച്.പി പവറും 27 എൻ.എം ടോർക്കുമേകും. അഞ്ച് സ്പീഡ് മാനുവലായിരിക്കും ഈ ബൈക്കിൽ ട്രാൻസ്മിഷൻ ഒരുക്കുന്നത്.
