ചൈനീസ് ടെക് ഭീമന്മാരായ റിയൽമി കഴിഞ്ഞ മാസമാണ് തങ്ങളുടെ ആദ്യ ലാപ്ടോപ്പ്, റിയൽമി ബുക്ക്, എന്നിവ ഇന്ത്യയിൽ അവതരിപ്പിച്ചത്. ഒരു മാസത്തിന് ശേഷം തങ്ങളുടെ ആദ്യ ടാബ്‌ലെറ്റും കമ്പനി അവതരിപ്പിച്ചു. റിയൽമി പാഡ് എന്നാണ് ഈ ടാബ്‌ലറ്റിന് പേരിട്ടിരിക്കുന്നത്.3 ജിബി + 32 ജിബി സ്റ്റോറേജ് പതിപ്പിൽ മാത്രം വില്പനക്കെത്തിയിരിക്കുന്ന റിയൽമി പാഡിന്റെ വൈഫൈ വേരിയന്റിന് 13,999 രൂപയാണ് വില. അതേസമയം വൈ-ഫൈ + 4ജി വേരിയന്റ് രണ്ട് പതിപ്പുകളിൽ ലഭ്യമാണ് – 3 ജിബി + 32 ജിബി ഓപ്ഷന് 15,999 രൂപയും, 4 ജിബി + 64 ജിബി ഓപ്ഷന് 17,999 രൂപയുമാണ് വില. റിയൽ ഗോൾഡ്, റിയൽ ഗ്രേ നിറങ്ങളിലാണ് റിയൽമി പാഡ് അവതരിപ്പിച്ചിരിക്കുന്നത്. റിയൽമി പാഡിന്റെ വൈഫൈ + 4ജി പതിപ്പുകളുടെ വില്പന ഈ മാസം 16ന് ഉച്ചയ്ക്ക് 12 മണി മുതൽ ഫ്ലിപ്കാർട്ട്, റിയൽമി.കോം വെബ്‌സൈറ്റുകൾ മുഖേനയും പ്രമുഖ ഓഫ്‌ലൈൻ സ്റ്റോറുകൾ മുഖേനയും ആരംഭിക്കും. ആൻഡ്രോയിഡ് 11 അടിസ്ഥാനമായ റിയൽമി യുഐ ഫോർ പാഡ് ആണ് ഓപ്പറേറ്റിംഗ് സിസ്റ്റം. 82.5 ശതമാനം സ്ക്രീൻ-ടു-ബോഡി റേഷ്യോയുള്ള ടാബ്‌ലെറ്റിൽ 10.4 ഇഞ്ച് WUXGA+ (2,000×1,200 പിക്സൽസ്) ഡിസ്പ്ലേയാണ്.മീഡിയാടെക് ഹീലിയോ ജി 80 SoC പ്രോസസറാണ് റിയൽമി പാഡിന്റെ ഹൃദയം.റിയൽമി പാഡിൽ മുൻവശത്ത് അൾട്രാ-വൈഡ് ലെൻസിനൊപ്പം 105 ഡിഗ്രി ഫീൽഡ്-ഓഫ്-വ്യൂ (FoV) ഉള്ള 8 മെഗാപിക്സൽ ക്യാമെറയാണ്. 6.9 മില്ലിമീറ്റർ വണ്ണവും 440 ഗ്രാം ഭാരവുമുള്ള അലുമിനിയം ബോഡിയാണ് റിയൽമി പാഡിന്.ഡോൾബി അറ്റ്മോസ്, ഹൈ-റെസ് ഓഡിയോ സപ്പോർട്ട് ചെയ്യുന്ന നാല് ഡൈനാമിക് സ്‌പീക്കറുകളാണ് റിയൽമി പാഡിൽ. നോയ്‌സ് ക്യാൻസിലേഷനുള്ള ഇരട്ട മൈക്രോഫോണുകളും റിയൽമി പാഡിലുണ്ട്. 18W ക്വിക്ക് ചാർജിംഗിനെ പിന്തുണയ്ക്കുന്ന 7,100mAh ബാറ്ററിയാണ് റിയൽമി പാഡിൽ പായ്ക്ക് ചെയ്യുന്നത്. OTG കേബിൾ വഴി റിവേഴ്സ് ചാർജിംഗും ടാബ്‌ലെറ്റ് പിന്തുണയ്ക്കുന്നു.
