ഇന്ത്യൻ സ്മാർട്ട്ഫോൺ നിർമാതാക്കളായ മൈക്രോമാക്സ് 2020 നവംബറിലാണ് ഇൻ ശ്രേണിയിൽ പുത്തൻ സ്മാർട്ട്ഫോണുകൾ അവതരിപ്പിച്ച് രണ്ടാം അദ്ധ്യായം തുടങ്ങിയത്. ഇൻ നോട്ട് 1, ഇൻ 1b എന്നിങ്ങനെ രണ്ട് ബഡ്ജറ്റ് ഫോണുകളാണ് ഇൻ ശ്രേണിയിൽ മൈക്രോമാക്സ് അവതരിപ്പിച്ചത്. ഇന്ന് ഇൻ നോട്ട് 2വിന്റെ അരങ്ങേറ്റമുണ്ടാവുമെന്ന് മൈക്രോമാക്സ് വ്യക്തമാക്കി.ലോഞ്ചുമായി ബന്ധപ്പെട്ട് പുറത്ത് വിട്ടിരിക്കുന്ന ഇൻസ്റ്റാഗ്രാം പോസ്റ്റിൽ ഇൻ നോട്ട് 2വിന്റെ ചില വിശദാംശങ്ങളും മൈക്രോമാക്സ് പുറത്ത് വിട്ടിട്ടുണ്ട്. ഇതിൽ ഏറ്റവും പ്രധാനം ഇൻ നോട്ട് 2വിന് ‘ഡാസ്‌ലിങ് ഗ്ലാസ് ഫിനിഷ്’ ഉണ്ടായിരിക്കും എന്നാണ്. പ്രീമിയം സ്മാർട്ട്ഫോണുകൾക്ക് സമാനമായ ഫിനിഷ് ഇൻ നോട്ട് 2വിനുണ്ടാകും എന്ന് ഇത് സൂചന നൽകുന്നു. മാത്രമല്ല ബ്രൗൺ, ബ്ലാക്ക് നിറങ്ങളിലാണ് ഇൻ നോട്ട് 2 വില്പനക്കെത്തുക എന്നും മൈക്രോമാക്സ് വ്യക്തമാക്കിയിട്ടുണ്ട്.ഇൻ നോട്ട് 2ന്റെ മുൻഗാമിയായ ഇൻ നോട്ട് 1ന് 10,999 രൂപയായിരുന്നു ലോഞ്ച് വില. പിന്നീട് വില 11,999 രൂപയായി കൂടിയെങ്കിലും അധികം താമസമില്ലാതെ 9,499 രൂപയായി കുറഞ്ഞു. ഇൻ നോട്ട് 2ന് ഏകദേശം 12,000 രൂപ വിലപ്രതീക്ഷിക്കാം.സാംസങ് ഗാലക്‌സി S20 ശ്രേണിയിലെ ഫോണുകൾക്ക് സമാനമായ പിൻ ക്യാമറയ്ക്കുള്ള കുത്തനെയുള്ള ക്ലസ്റ്റർ ആണ് മറ്റൊരു ആകർഷണം. ഡാസ്‌ലിങ് ഗ്ലാസ് ഫിനിഷും, പുത്തൻ കാമറ ക്ലസ്റ്ററും ചേർന്ന് ഇൻ നോട്ട് 2ന് പ്രീമിയം ലുക്ക് നൽകും എന്ന് പ്രതീക്ഷിക്കാം.6.67 ഇഞ്ച് ഫുൾ എച്ച്ഡി+ ഡിസ്പ്ലേ, മീഡിയടെക് ഹീലിയോ ജി85 SoC പ്രോസസ്സർ, 18W ഫാസ്റ്റ് ചാർജിംഗിനെയും പിന്തുണയ്ക്കുന്ന 5,000 mAh ബാറ്ററി എന്നിവയും 48 മെഗാപിക്സൽ പ്രൈമറി സെൻസറുള്ള ക്വാഡ് ക്യാമെറയുമാണ് ഇൻ നോട്ട് 1ൽ മൈക്രോമാക്സ് ക്രമീകരിച്ചിരിക്കുന്നത്. ഇൻ നോട്ട് 2ൽ ഇതിനേക്കാൾ മികച്ച സ്പെസിഫിക്കേഷൻ തീർച്ചയായും പ്രതീക്ഷിക്കാം.
