പ്രമുഖ ടെക് ബ്രാൻഡായ ലെനോവോ തങ്ങളുടെ ലാപ്ടോപ്പ് ശ്രേണിയിലെ സ്റ്റൈലിഷ് താരം തിങ്ക്പാഡ് X1 ഫോൾഡ് ഇന്ത്യയിൽ അവതരിപ്പിച്ചു. മൾട്ടിലിങ്ക് ടോർക്ക് ഹിൻജിന്റെ സഹായത്തോടെ ഡിസ്പ്ലേ ഒരു പുസ്തകം പോലെ മടക്കാം എന്നുള്ളതാണ് തിങ്ക്പാഡ് X1 ഫോൾഡിന്റെ സവിശേഷത. ലെനോവോ തിങ്ക്പാഡ് X1 ഫോൾഡിന് 3.29 ലക്ഷം രൂപയാണ് വില. അതെ സമയം ലെനോവോ ഇന്ത്യ വെബ്‌സൈറ്റിൽ 2.5 ലക്ഷം ആണ് ഇപ്പോൾ വില ലിസ്റ്റ് ചെയ്തിരിക്കുന്നത്. വിവിധ ഓഫറുകളുടെ ഭാഗമായി ഈ മാസം അവസാനം വരെ കുറഞ്ഞ വിലയ്ക്ക് തിങ്ക്പാഡ് X1 ഫോൾഡ് ലഭ്യമാവും എന്ന് ലെനോവോ വ്യക്തമാക്കി.
പിഓഎൽഇഡി ഡിസ്പ്ലേയാണ് ലെനോവോ തിങ്ക്പാഡ് X1 ഫോൾഡ് ലാപ്ടോപ്പിൽ. മടക്ക് വരുന്ന ഭാഗത്ത് ഡിസ്‌പ്ലേയ്‌ക്കിടയിൽ ഒരു മെക്കാനിക്കൽ ഹിഞ്ച് ഉണ്ട്. ഉപയോക്താക്കൾക്ക് ലാൻഡ്‌സ്‌കേപ്പ് മോഡിൽ തിങ്ക്പാഡ് X1 ഫോൾഡ് ഒരു സാധാരണ ലാപ്‌ടോപ്പായും പോർട്രെയിറ്റ് ഓറിയന്റേഷനിൽ ഒരു നോട്ട്ബുക്കായും ഉപയോഗിക്കാം. ലെനോവയുടെ ആക്റ്റീവ് പെൻ ഉപയോഗിച്ച് ഡിസ്‌പ്ലേയിൽ എഴുതാനും വരയ്ക്കാനും സാധിക്കും.വിൻഡോസ് 10 പ്രോ ഓപ്പറേറ്റിംഗ് സിസ്റ്റമായ തിങ്ക്പാഡ് X1 ഫോൾഡിൽ ലെനോവോ മോഡ് സ്വിച്ചർ ആപ്ലിക്കേഷൻ പ്രീലോഡ് ചെയ്തിട്ടുണ്ട്. ഇത് ഡിസ്പ്ലേ അനുസരിച്ച് ഓറിയന്റേഷൻ മാറ്റാൻ സഹായിക്കും. മടക്കുന്ന സമയത്ത് ഒരു ഡിസ്‌പ്ലേയുടെ ഭാഗത്ത് കീബോർഡ്‌ സ്ഥാപിച്ചാൽ രണ്ടാമത്തെ ഡിസ്പ്ലേ അതിനനുസരിച്ച് പുനക്രമീകരിക്കും.ഇന്റൽ കോർ ഐ 5 പ്രോസസർ, 11-ാം തലമുറ ഇന്റൽ യുഎച്ച്ഡി ഗ്രാഫിക്സ്, 8 ജിബി എൽപിഡിഡിആർ 4 എക്സ് റാം, 1 ടിബി വരെ പിസിഐഇ-എൻവിഎം എം 222 എസ്എസ്ഡി (ഹാർഡ് ഡിസ്ക്) എന്നിവയാണ് ലെനോവോ തിങ്ക്പാഡ് X1 ഫോൾഡിൽ ഉൾക്കൊള്ളിച്ചിരിക്കുന്നത്.വൈ-ഫൈ 6, ബ്ലൂടൂത്ത് വി 5.1, രണ്ട് യുഎസ്ബി ടൈപ്പ്-സി 3.2 ജെൻ 2 പോർട്ടുകൾ (ഒന്ന് ഡിസ്പ്ലേ പോർട്ടായി ഉപയോഗിക്കാം) എന്നിവയാണ് കണക്ടിവിറ്റി ഓപ്ഷനുകൾ. ഓപ്‌ഷണൽ 5ജി / 4ജി എൽടിഇ പിന്തുണയുമുണ്ട്. നാല് മൈക്രോഫോണുകളും ഡോൾബി അറ്റ്‌മോസ് സ്പീക്കർ സിസ്റ്റം, വിൻഡോസ് ഹലോ ഫേഷ്യൽ റെക്കഗ്നിഷനും വീഡിയോ ചാറ്റ് സപ്പോർട്ടിനുമുള്ള ഹൈബ്രിഡ് ഇൻഫ്രാറെഡ് (ഐആർ), എച്ച്ഡി വെബ്‌ക്യാം എന്നിവയും തിങ്ക്പാഡ് എക്സ് 1 ഫോൾഡിൽ ഉൾപ്പെടുന്നു.
