ക്വാൽകോം സ്നാപ്ഡ്രാഗൺ പ്രോസസറുകൾക്ക് പകരം ഗൂഗിൾ സ്വന്താമായി വികസിപ്പിച്ചെടുത്ത ‘വൈറ്റ് ചാപ്പൽ’ എന്ന് കോഡ് പേരുള്ള ചിപ്സെറ്റായിരിക്കും ഗൂഗിൾ പിക്സൽ 6 ശ്രേണിയിൽ ഈ വർഷം വിപണിയിലെത്തുന്ന ഫോണുകൾക്ക് നൽകുകയെന്ന സൂചനകൾ കഴിഞ്ഞ കുറച്ച് മാസങ്ങളായി പ്രചരിച്ചിരുന്നു.ഒക്ടോബറിലാണ് പിക്സൽ 6 ഫോണുകളുടെ ലോഞ്ച് എങ്കിലും കഴിഞ്ഞ ദിവസം ട്വിറ്ററിലൂടെ പുത്തൻ ഫോണുകളെ സംബന്ധിച്ച നിർണ്ണായക വിവരങ്ങൾ പുറത്ത് വിട്ടു. ഊഹാപോഹങ്ങൾ ശരിവയ്ക്കും വിധം സ്വന്തം പ്രോസസ്സറാണ് പിക്സൽ 6 ഫോണുകളെ പ്രവർത്തിപ്പിക്കുക എന്ന് ഗൂഗിൾ വ്യക്തമാക്കി.ടെൻസർ (Tensor) എന്നാണ് ഗൂഗിളിന്റെ പുത്തൻ പ്രോസസ്സറിന്റെ പേര്. കമ്പനിയുടെ ഏറ്റവും ശക്തമായ ആർട്ടിഫിഷ്യൽ ഇന്റലിജൻസ് (നിർമിത ബുദ്ധി), മെഷീൻ ലേർണിംഗ് എന്നിവയുടെ പ്രയോജനം നേരിട്ട് സ്മാർട്ട്ഫോണുകൾക്ക് ലഭിക്കത്തക്ക വിധമാണ് ടെൻസർ തയ്യാറാക്കിയിരിക്കുന്നത് എന്നാണ് ഗൂഗിൾ പറയുന്നത്. മാത്രമല്ല ടെൻസർ ചിപ്പ് സ്മാർട്ട്ഫോണിന്റെ ക്യാമറ ഫീച്ചറുകൾ, സ്‌പീച് റെകഗ്‌നീഷൻ എന്നിങ്ങനെയുള്ള നിരവധി ഫീച്ചറുകൾ മെച്ചപ്പെടുത്താൻ സഹായിക്കുമെന്നും അവകാശപ്പെടുന്നു. കഴിഞ്ഞ നാലര വർഷത്തെ പരിശ്രമത്തിന്റെ ഫലമാണ് പുത്തൻ ചിപ്സെറ്റ് എന്ന് ഗൂഗിൾ സിഇഒ സുന്ദർ പിച്ചൈ ബ്ലോഗ് പോസ്റ്റിലൂടെ വ്യക്തമാക്കി.
ഗൂഗിൾ പിക്സൽ 6 ശ്രേണിയിൽ രണ്ട് ഫോണുകളാണുള്ളത്. അടിസ്ഥാന പിക്സൽ 6ഉം സാധാരണ ഗതിയിൽ XL എന്ന വാൽകഷണവുമായി അവതരിപ്പിക്കാറുള്ള പ്രീമിയം പതിപ്പിന് പകരം ഇത്തവണ പിക്സൽ 6 പ്രോയും. 6.4 ഇഞ്ച് ഡിസ്‌പ്ലേയാണ് പിക്സൽ 6ന്. അതെ സമയം പ്രോ മോഡലിന് 6.7 ഇഞ്ച് ഡിസ്പ്ലേ ലഭിക്കും.പിൻ കാമറ ക്ലസ്റ്റർ ഒരല്പം പുറത്തേക്ക് തള്ളി നിൽക്കുന്ന പുത്തൻ കാമറ ഡിസൈനുകൾ കവച്ചുവച്ച് സ്മാർട്ട്ഫോണിന്റെ അതെ വീതിയിൽ കറുപ്പ് നിറത്തിൽ ഒരു ‘കാമറ ബാർ’ ആണ് പിക്സൽ 6 ഫോണുകളിൽ ക്രമീകരിച്ചിരിക്കുന്നത്. പിക്സൽ 6 ഡ്യുവൽ റിയർ ക്യാമറയുമായി വിപണിയിലെത്തുമ്പോൾ പിക്സൽ ഫോണുകളിൽ ആദ്യമായി ടെലിഫോട്ടോ ലെൻസ് അടക്കം ട്രിപ്പിൾ ക്യാമെറയുമായാണ് പിക്സൽ 6 പ്രോ അവതരിപ്പിക്കുക. 4x ഒപ്റ്റിക്കൽ സൂമും ഈ കാമറ സപ്പോർട്ട് ചെയ്യും.3 വീതം ഇരട്ട നിറങ്ങളിലാണ് പിക്സൽ 6, പിക്സൽ 6 പ്രോ ഫോണുകൾ വിപണിയിലെത്തുക. പിക്സൽ 6 ഫോണിന് മാറ്റ് അലുമിനിയം ഫിനിഷ് ലഭിക്കുമ്പോൾ പിക്സൽ 6 പ്രോ ഫോണുകൾക്ക് തിളങ്ങുന്ന പോളിഷ്ഡ് അലുമിനിയം ഫിനിഷാണ്.ഗൂഗിൾ പിക്സൽ 6 സീരീസ് ഹാർഡ്‌വെയർ സുരക്ഷയുടെ കാര്യത്തിൽ വിപണിയിലെ ഏത് ഫോണിനേക്കാളും സുരക്ഷിതമായിരിക്കും എന്നാണ് ഗൂഗിൾ അവകാശപ്പെടുന്നത്.
