ചൈനീസ് സ്മാർട്ട്ഫോൺ നിർമ്മാതാക്കളായ ഷവോമി മാർച്ച് മാസം നാലാം തിയതിയാണ് റെഡ്മി നോട്ട് 9 ശ്രേണിയുടെ പിൻഗാമിയായി റെഡ്മി നോട്ട് 10 ഇന്ത്യയിൽ അവതരിപ്പിച്ചത്. റെഡ്മി നോട്ട് 10 എന്ന അടിസ്ഥാന മോഡൽ, റെഡ്മി നോട്ട് 10 പ്രോ, റെഡ്മി നോട്ട് 10 പ്രോ മാക്സ് എന്നിങ്ങനെ മൂന്ന് മോഡലുകൾ ചേർന്നതാണ് റെഡ്മി നോട്ട് 10 ശ്രേണി. ഇതിൽ റെഡ്മി നോട്ട് 10ന്റെ വില രണ്ട്‌ മാസം തികയുമ്പോഴേക്കും ഷഓമി കൂട്ടി.
4 ജിബി റാം + 64 ജിബി സ്റ്റോറേജ് പതിപ്പിന് 11,999 രൂപ, 6 ജിബി റാം + 128 ജിബി സ്റ്റോറേജ് മോഡലിന് 13,999 രൂപ എന്നിങ്ങനെയായിരുന്നു റെഡ്മി നോട്ട് 10ന്റെ ലോഞ്ച് വില. ഇപ്പോൾ 4 ജിബി റാം പതിപ്പിന് 12,499 രൂപയും 6 ജിബി റാം പതിപ്പിന് 14,499 രൂപയുമാണ് വില. അതായത് ഇരു പതിപ്പുകൾക്കും 500 രൂപ കൂടി. റെഡ്മി നോട്ട് 10 പ്രോ, റെഡ്മി നോട്ട് 10 പ്രോ മാക്സ് മോഡലുകളുടെ വില അതേസമയം ഷഓമി വർദ്ധിപ്പിച്ചിട്ടില്ല.അക്വാ ഗ്രീൻ, ഫ്രോസ്റ്റ് വൈറ്റ്, ഷാഡോ ബ്ലാക്ക് എന്നീ നിറങ്ങളിൽ ലഭ്യമായ അടിസ്ഥാന റെഡ്മി നോട്ട് 10, ആൻഡ്രോയിഡ് 11 അടിസ്ഥാനമായ MIUI 12 ഓപ്പറെറ്റിംഗ് സിസ്റ്റത്തിൽ ആണ് പ്രവർത്തിക്കുന്നത്. 6.43 ഇഞ്ച് ഫുൾ എച്ച്ഡി + (1,080×2,400 പിക്‌സൽ) സൂപ്പർ അമോലെഡ് ഡിസ്‌പ്ലേയാണ് റെഡ്മി നോട്ട് 10-ന്. കോർണിംഗ് ഗോറില്ല ഗ്ലാസ് 3 പരിരക്ഷണവും ഈ ഡിസ്‌പ്ലേയ്ക്കുണ്ട്. അഡ്രിനോ 612 ജിപിയുവുമായി ചേർന്ന് പ്രവർത്തിക്കുന്ന ക്വാൽകോം സ്‌നാപ്ഡ്രാഗൺ 678 SoC പ്രോസസ്സർ ആണ് റെഡ്മി നോട്ട് 10-ന്റെ ഹൃദയം.48 മെഗാപിക്സൽ പ്രൈമറി സോണി ഐഎംഎക്സ് 582 സെൻസറും 8 മെഗാപിക്സൽ അൾട്രാ-വൈഡ് ആംഗിൾ ഷൂട്ടർ, 2 മെഗാപിക്സൽ മാക്രോ ഷൂട്ടർ, 2 മെഗാപിക്സൽ ഡെപ്ത് സെൻസർ എന്നിവ ചേർന്ന ക്വാഡ് ക്യാമെറായാണ് അടിസ്ഥാന റെഡ്മി നോട്ട് 10-ൽ. സെൽഫികൾക്കും വീഡിയോ ചാറ്റുകൾക്കുമായി, മുൻവശത്ത് 13 മെഗാപിക്സൽ സെൽഫി ക്യാമറയുമുണ്ട്.33W ഫാസ്റ്റ് ചാർജിംഗിനെ പിന്തുണയ്ക്കുന്ന 5,000 എംഎഎച്ച് ബാറ്ററിയാണ് ഫോണിന്.
