വിപണിയിലെ മികച്ച പ്രതികരണം തിരിച്ചറിഞ്ഞ് ഹൈറൈഡറിന്റെ സി.എന്‍.ജി. പതിപ്പും വിപണിയില്‍ എത്തിച്ചിരിക്കുകയാണ് ടൊയോട്ട.ഹൈറൈഡര്‍ എസ്,ജി എന്നീ രണ്ട് വേരിയന്റുകളില്‍ എത്തിയിട്ടുള്ള ഈ വാഹനത്തിന് യഥാക്രമം 13.23 ലക്ഷം രൂപയും 15.29 ലക്ഷം രൂപയുമാണ് എക്‌സ്‌ഷോറൂം വില. അതായത് പെട്രോള്‍ കരുത്തില്‍ എത്തിയിട്ടുള്ള ഹൈറൈഡറിനെക്കാള്‍ 95,000 രൂപ അധികമാണ് ഹൈറൈഡറിന്റെ സി.എന്‍.ജി. മോഡലിനെന്നാണ് വിലയിരുത്തല്‍. അവതരണത്തിന് പിന്നാലെ തന്നെ ഈ വാഹനത്തിനുള്ള ബുക്കിങ്ങുകള്‍ ടൊയോട്ടയുടെ ഡീലര്‍ഷിപ്പുകളിലും ഓണ്‍ലൈന്‍ പ്ലാറ്റ്‌ഫോമുകളിലും ആരംഭിച്ചു. ഹൈറൈഡറിന്റെ റെഗുലര്‍ പെട്രോള്‍ മോഡലില്‍ നല്‍കിയിട്ടുള്ള 1.5 ലിറ്റര്‍ പെട്രോള്‍ എന്‍ജിനൊപ്പം സി.എന്‍.ജി. സംവിധാനവുമായാണ് ഈ വാഹനം എത്തിയിട്ടുള്ളത്. സി.എന്‍.ജി. മോഡല്‍ 87.83 പി.എസ്. പവറും 121.5 എന്‍.എം. ടോര്‍ക്കുമാണ് ഉത്പാദിപ്പിക്കുന്നത്. ഒരു കിലോഗ്രാം സി.എന്‍.ജിയില്‍ 26.6 കിലോമീറ്റര്‍ മൈലേജാണ് ഹൈറൈഡര്‍ സി.എന്‍.ജിയില്‍ നിര്‍മാതാക്കള്‍ ഉറപ്പുനല്‍കുന്നത്.ഇന്ത്യയിലെ ഏറ്റവുമധികം മൈലേജുള്ള എസ്.യു.വികളില്‍ ഒന്ന് എന്ന വിശേഷണമാണ് ഹൈറൈഡറിനുള്ളത്.
