ദക്ഷിണ കൊറിയൻ ടെക് കമ്പനിയായ സാംസങിന്റെ ഗാലക്‌സി F സീരീസ് ഫോൺ ശ്രേണിയിലേക്ക് ഒരു പുത്തൻ ഫോൺ കൂടെ. ഗാലക്‌സി F22 ആണ് പുത്തൻ താരം. 4 ജിബി റാം + 64 ജിബി സ്റ്റോറേജ് പതിപ്പിന് 12,499 രൂപ, 6 ജിബി റാം + 128 ജിബി സ്റ്റോറേജ് പതിപ്പിന് 14,499 രൂപ എന്നിങ്ങനെയാണ് സാംസങ് ഗാലക്‌സി F22ന്റെ വില. സാംസങ് ഓൺലൈൻ സ്റ്റോറിലൂടെയും ഫ്ലിപ്കാർട്ടിലൂടെയും ഈ മാസം 13 മുതലാണ് സാംസങ് ഗാലക്‌സി F22ന്റെ വില്പന ആരംഭിക്കുക. ഇൻട്രൊഡക്ടറി ഓഫർ എന്ന നിലയ്ക്ക് ഫ്ലിപ്കാർട്ടിൽ പ്രീപെയ്ഡായി വാങ്ങുന്നവർക്ക് 1,000 രൂപ കിഴിവ് പ്രഖ്യാപിച്ചിട്ടുണ്ട്. ഡെനിം ബ്ലൂ, ഡെനിം ബ്ലാക്ക് എന്നീ രണ്ട് നിറങ്ങളിൽ സാംസങ് ഗാലക്‌സി F22 വാങ്ങാം.
ആൻഡ്രോയിഡ് 11 അടിസ്ഥാനമാക്കിയുള്ള വൺ യുഐ 3.1 ഓപ്പറേറ്റിംഗ് സിസ്റ്റത്തിൽ പ്രവർത്തിക്കുന്ന സാംസങ് ഗാലക്‌സി F22ന് 90 ഹെർട്സ് റിഫ്രഷ് റേറ്റുള്ള 6.4 ഇഞ്ച് എച്ച്ഡി + (700×1,600 പിക്‌സൽ) എസ്അമോലെഡ് ഇൻഫിനിറ്റി-യു ഡിസ്‌പ്ലേയാണ്. മീഡിയടെക് ഹീലിയോ G80 SoC ആണ് ഫോണിന്റെ കരുത്ത്. 48 മെഗാപിക്സലിന്റെ പ്രധാന ക്യാമറ, 8 മെഗാപിക്സൽ അൾട്രാ വൈഡ് ക്യാമറ, 2 മെഗാപിക്സൽ മാക്രോ ലെൻസ്, 2 മെഗാപിക്സൽ ഡെപ്ത് സെൻസർ എന്നിവ ഉൾപ്പെടുന്നതാണ് സാംസങ് ഗാലക്‌സി F22ന്റെ ക്വാഡ് കാമറ. മുൻവശത്ത്, വാട്ടർ ഡ്രോപ്പ്-സ്റ്റൈൽ നോച്ചിനുള്ളിൽ 13 മെഗാപിക്സൽ സെൽഫി ക്യാമറ ക്രമീകരിച്ചിട്ടുണ്ട്.25W ഫാസ്റ്റ് ചാർജിംഗ് പിന്തുണയുള്ള 6,000 എംഎഎച്ച് ബാറ്ററിയാണ് സാംസങ് ഗാലക്‌സി F22-ൽ പായ്ക്ക് ചെയ്യുന്നത്. ബോക്സിനുള്ളിൽ 15W ചാർജർ ആണ് ലഭിക്കുക.
