റെഡ്മി നോട്ട് 11 പ്രോ ശ്രേണി ഇന്ത്യയിൽ അവതരിപ്പിക്കാനൊരുങ്ങുകയാണ് ഷഓമി. റെഡ്മി നോട്ട് 11 പ്രോ, റെഡ്മി നോട്ട് 11 പ്രോ+ 5ജി എന്നീ ഫോണുകളുടെ പുത്തൻ ശ്രേണിയുടെ ലോഞ്ച് അടുത്ത മാസം 9നാണ് ഷഓമി ക്രമീകരിച്ചിരിക്കുന്നത്.കഴിഞ്ഞ വർഷം ഒക്ടോബറിൽ ചൈനയിൽ അരങ്ങേറ്റം കുറിച്ച റെഡ്മി നോട്ട് 11 സീരീസിന്റെ ഭാഗമായിരുന്നു പ്രോ മോഡലുകൾ. ഇതിൽ റെഡ്മി നോട്ട് 11 പ്രോ+ ഇന്ത്യയിൽ ഷവോമി 11i ഹൈപ്പർചാർജ് എന്ന പേരിൽ അടുത്തിടെ വില്പനക്കെത്തിയിരുന്നു. അതുകൊണ്ട് തന്നെ ചൈനീസ് പതിപ്പല്ല മറിച്ച് ജനുവരിയിൽ ആഗോള വിപണിയിൽ എത്തിയ പതിപ്പുകളാണ് ഇന്ത്യൻ വിപണയിൽ അടുത്ത മാസമെത്തുക എന്നാണ് കരുതുന്നത്.
റെഡ്മി നോട്ട് 11 പ്രോ
ആൻഡ്രോയിഡ് 11 അടിസ്ഥാനമായ MIUI 13 സ്കിന്നിലാണ് ആഗോള വിപണിയിലെ റെഡ്മി നോട്ട് 11 പ്രോ പ്രവർത്തിക്കുന്നത്. 8 ജിബി വരെ LPDDR4X റാമുമായി ജോടിയാക്കിയ ഒക്ടാ-കോർ മീഡിയടെക് ഹീലിയോ G96 SoC ആണ് പ്രോസസർ. 120 ഹെർട്‌സ് റിഫ്രഷ് റേറ്റും 1200 നിറ്റ്‌സ് പീക്ക് ബ്രൈറ്റ്നെസ്സുമുള്ള 6.67 ഇഞ്ച് ഫുൾ-എച്ച്‌ഡി + അമോലെഡ് ഡിസ്‌പ്ലേയാണ്.108 മെഗാപിക്സൽ പ്രൈമറി ക്യാമറ, 8 മെഗാപിക്സൽ അൾട്രാ വൈഡ് ക്യാമറ, രണ്ട് 2 മെഗാപിക്സൽ മാക്രോ, ഡെപ്ത് ക്യാമറ സെൻസറുകൾ എന്നിവയുള്ള ക്വാഡ് ക്യാമറയാണ് ഹാൻഡ്സെറ്റിൽ. മുൻവശത്ത് 16 മെഗാപിക്സൽ സെൽഫി ക്യാമറയാണ് സ്മാർട്ട്ഫോണിന്. റെഡ്മി നോട്ട് 11 പ്രോ 67W ഫാസ്റ്റ് ചാർജിംഗിനുള്ള പിന്തുണയോടെ 5,000mAh ബാറ്ററിയിലാണ് പ്രവർത്തിക്കുന്നത്.
റെഡ്മി നോട്ട് 11 പ്രോ+ 5ജി
ആഗോള വിപണിയിൽ അവതരിപ്പിച്ച റെഡ്മി നോട്ട് 11 പ്രോ 5ജി പതിപ്പ് ഇന്ത്യയിൽ റെഡ്മി നോട്ട് 11 പ്രോ+ 5ജി എന്ന പേരിൽ അവതരിപ്പിക്കും എന്നാണ് പ്രതീക്ഷിക്കുന്നത്. അങ്ങനെയെങ്കിൽ 120 ഹെർട്‌സ് റിഫ്രഷ് റേറ്റുള്ള 6.67 ഇഞ്ച് അമോലെഡ് ഡിസ്‌പ്ലേ, സ്‌നാപ്ഡ്രാഗൺ 695 SoC പ്രോസസർ എന്നിവ പ്രതീക്ഷിക്കാം.108-മെഗാപിക്സൽ പ്രൈമറി, 8-മെഗാപിക്സൽ അൾട്രാ-വൈഡ്, 2-മെഗാപിക്സൽ മാക്രോ ക്യാമറകൾ ഉൾകൊള്ളുന്ന ക്വാഡ് ക്യാമറയും, 16 മെഗാപിക്സലിന്റെ സെൽഫി ക്യാമറയും ഹാൻഡ്സെറ്റിൽ ഇടം പിടിക്കും. 67W ചാർജിംഗിനെ പിന്തുണയ്ക്കുന്ന 5,000mAh ബാറ്ററി ഫോണിൽ ഇടം പിടിക്കും.
