മെറ്റ കമ്പനിയുടെ ഇൻസ്റ്റന്റ് മെസ്സേജിങ് ആപ്പായ വാട്സ്ആപ്പിൽ മൂന്ന് പുതിയ ഫീച്ചറുകൾ അവതരിപ്പിച്ചു. രണ്ട് ഫീച്ചറുകൾ വാട്ട്‌സ്ആപ്പ് ആപ്പിലേക്കുള്ള അപ്‍ഡേയ്റ്റും ഒരെണ്ണം ലാപ്ടോപ്പ്/ഡെസ്ക്ടോപ്പ് കംപ്യൂട്ടറുകളിൽ വാട്സ്ആപ്പ് ഉപയോഗിക്കാൻ സഹായിക്കുന്ന വാട്സ്ആപ്പ് വെബ് സംവിധാനത്തിലേക്കുള്ള അപ്‍ഡേയ്റ്റുമാണ്.
ലിങ്ക് പ്രിവ്യൂ – ഓൺലൈനിൽ വായിക്കുകയോ, കാണുകയോ, കേൾക്കുകയോ ചെയ്ത ഒരു രസകരമായ കണ്ടന്റ് കോൺടാക്റ്റ് ലിസ്റ്റിലുള്ളവരുമായി ഷെയർ ചെയ്യാൻ ലിങ്കുകൾ വാട്സ്ആപ്പിൽ പോസ്റ്റ് ചെയ്താൽ മതി. ഈ ലിങ്കുകൾ പോസ്റ്റ് ചെയ്യുമ്പോഴുള്ള പ്രിവ്യു ആണ് പുതുതായി മാറ്റിയിരിക്കുന്നത്. ലിങ്കിന്റെ ഫുൾ പ്രിവ്യു ഇനി വാട്സ്ആപ്പിൽ ലഭിക്കും. എന്താണ് വായിക്കാൻ, കാണാൻ, കേൾക്കാൻ പോകുന്നത് എന്നത് സംബന്ധിച്ചും, എത്ര ദൈർഖ്യമുള്ള വാർത്തയാണ് വിഡിയോയാണ് തുടങ്ങിയ വിവരങ്ങൾ മുൻകൂട്ടി അറിയാം.
വെബ് മീഡിയ എഡിറ്റർ – ഇതുവരെ വാട്സ്ആപ്പ് വെബ്ബിൽ ഒരു ചിത്രം എഡിറ്റ് ചെയ്യുക അസാദ്ധ്യമായിരുന്നു. ഫോട്ടോ എഡിറ്റ് ചെയ്യേണ്ടമെങ്കിൽ മൊബൈൽ ഫോണിൽ തന്നെ വാട്സ്ആപ്പ് ഉപയോഗിക്കേണമായിരുന്നു. എന്നാൽ ഇനി മുതൽ വാട്സ്ആപ്പ് വെബ്ബിൽ തന്നെ അടിസ്ഥാന പിക്ചർ എഡിറ്റിംഗ് നടത്താം. മീഡിയ എഡിറ്റർ വെബ് എന്നാണ് ഈ സംവിധാനത്തിന്റെ പേര്.
സ്റ്റിക്കർ സജഷൻ – വാട്സ്ആപ്പ് ചാറ്റിനിടെ ശരിയായ സ്റ്റിക്കർ കണ്ടെത്താൻ നിങ്ങൾ സാധാരണയായി ഒന്നിലധികം ടാബുകൾ പരിശോധിക്കേണ്ടതുണ്ട്. ഇത് ചിലപ്പോൾ സംഭാഷണത്തിന്റെ ഒഴുക്കിനെ തടസ്സപ്പെടുത്തിയേക്കാം, ചിലപ്പോൾ നിങ്ങൾ തിരയുന്ന സ്റ്റിക്കർ പെട്ടന്ന് കണ്ടെത്താൻ സാധിച്ചു എന്നും വരില്ല. പുതിയ അപ്ഡെയ്‌റ്റോടെ ശരിയായ സ്റ്റിക്കർ വേഗത്തിലും എളുപ്പത്തിലും കണ്ടെത്താൻ വാട്ട്‌സ്ആപ്പ് സഹായിക്കും. നിങ്ങൾ ടൈപ്പുചെയ്യുമ്പോൾ വാക്കിന് യോജിച്ച സ്റ്റിക്കറുകൾ വാട്സ്ആപ്പ് തന്നെ പ്രദർശിപ്പിക്കും. ഇതിൽ നിന്നും നിങ്ങളുടെ ചാറ്റിന് ഏറ്റവും യോജിച്ച സ്റ്റിക്കർ തിരഞ്ഞെടുക്കാം.
