മുൻനിര ക്യാമറ നിർമ്മാതാക്കളായ കാനൺ ഇന്ത്യൻ വിപണിയിൽ പുതിയ മിറർലെസ് ക്യാമറ പുറത്തിറക്കി. കാനൺ ഇഒഎസ് ആർ100 (Canon EOS R100) എന്ന കോമ്പാക്റ്റ് മിറർലെസ് ക്യാമറയാണ് കമ്പനി അവതരിപ്പിച്ചിരിക്കുന്നത്.പുതിയ കോംപാക്റ്റ് ക്യാമറയിൽ APS-C വലുപ്പമുള്ള CMOS ഇമേജ് സെൻസറാണ് നൽകിയിട്ടുല്ളത്. ഇത് ഏറ്റവും ചെറിയതും ഭാരം കുറഞ്ഞതുമായ ഇഒഎസ് ആർ സീരീസ് ക്യാമറയാണ്.കാനൺ ക്യാമറ കണക്റ്റ് ഉപയോഗിച്ച് ആൻഡ്രോയിഡ്, ഐഒഎസ് ഡിവൈസുകളിലേക്ക് വളരെ വേഗത്തിൽ തന്നെ ഫോട്ടോകൾ കൈമാറാൻ സഹായിക്കുന്ന ബ്ലൂടൂത്ത്, വൈഫൈ പോലുള്ള കണക്റ്റിവിറ്റി ഫീച്ചറുകളുമായിട്ടാണ് കാനൺ ഇഒഎസ് ആർ100 ക്യാമറ വരുന്നത്. പുതിയ തലമുറയുടെ ആവശ്യങ്ങളെ നിറവേറ്റുന്ന കണക്റ്റിവിറ്റി ഓപ്ഷനുകളാണ് ഇവ. ഒരു കോംപാക്റ്റ് ക്യാമറയായിട്ടും ഈ ക്യാമറ ഡിജിറ്റൽ ഒലെഡ് വ്യൂഫൈൻഡറും മികച്ച ഗ്രിപ്പുമായിട്ടാണ് വരുന്നത്.ഫേസ് ട്രാക്കിംഗ് ഓട്ടോഫോക്കസ്, സ്‌പോർട്‌സ് ഓട്ടോഫോക്കസ്, 1 പോയിന്റ് ഓട്ടോഫോക്കസ്, സോൺ ഓട്ടോഫോക്കസ് തുടങ്ങിയ ഫീച്ചറുകളാണ് കാനൺ ഇഒഎസ് ആർ100 ക്യാമറയിലുള്ളത്. 24.1 എംപി സെൻസറാണ് ക്യാമറയിലുള്ളത്. ഈ ക്യാമറയ്ക്ക് 100 മുതൽ 12,800 വരെ ഐഒഎസ് റേഞ്ചുണ്ട്. ക്യാമറ ഉപയോഗിച്ച് 1080p റെസല്യൂഷനിലുള്ള വീഡിയോകൾ എടുക്കുമ്പോൾ 100 മുതൽ 12,800 വരെ മികച്ച ഐഒഎസ് റേഞ്ച് ലഭിക്കുന്നു. ഇത് ലൈറ്റ് കുറഞ്ഞ അവസരങ്ങളിൽ ഏറെ സഹായകരമാണ്.
കണ്ടിന്യുവസ് ഷൂട്ടിങ് മോഡിൽ കാനൺ ഇഒഎസ് ആർ100ന് പരമാവധി 1/4,000 സെക്കൻഡ് ഷട്ടർ സ്പീഡിൽ സെക്കൻഡിൽ 6.5 ഫ്രെയിമുകൾ ഷൂട്ട് ചെയ്യാൻ കഴിയും. വീഡിയോഗ്രാഫിയുടെ കാര്യത്തിലും ക്യാമറ മികവ് പുലർത്തുന്നുണ്ട്. ഈ ക്യാമറയ്ക്ക് 24/25fpsൽ 4K വീഡിയോകൾ വരെ ഷൂട്ട് ചെയ്യാൻ കഴിയും. 60fps വരെ 1080p വീഡിയോകൾ ഷൂട്ട് ചെയ്യാനുള്ള ശേഷിയും ഈ ക്യാമറയ്ക്കുണ്ട്. ഒറ്റ ടേക്കിൽ ക്യാമറയ്ക്ക് 29 മിനിറ്റ് 59 സെക്കൻഡ് നോർമൽ വീഡിയോയും 7 മിനിറ്റ് 29 സെക്കൻഡ് ഹൈ ഫ്രെയിം റേറ്റ് വീഡിയോയും ഷൂട്ട് ചെയ്യാനുള്ള കഴിവുണ്ട്.കാനൺ ഇഒഎസ് ആർ100 ക്യാമറ UHS-I കാർഡുകൾ സപ്പോർട്ട് ചെയ്യുന്നു. ഈ പുതിയ ക്യാമറയ്‌ക്കൊപ്പം വെറും 25 സെന്റിമീറ്റർ നീളവും 120 ഗ്രാം ഭാരവുമുള്ള RF28mm f/2.8 STM പാൻകേക്ക് ലെൻസും കമ്പനി പുറത്തിറക്കിയിട്ടുണ്ട്. ഈ ലെൻസ് ഫുൾ ഫ്രെയിം കാനൻ മിറർലെസ് ക്യാമറകളിലും EOS R100 പോലെയുള്ള APS-C സെൻസർ ടൈപ്പ് ക്യാമറകളിലും ഒരുപോലെ ഉപയോഗിക്കാൻ സാധിക്കുന്നതാണ്. ലിഥിയം പോളിമർ ഇ17 ബാറ്റിയാണ് ഈ ക്യാമറയിൽ കാനൺ നൽകിയിട്ടുള്ളത്.2023 ജൂണിലാണ് ക്യാമറയും ലെൻസും വിൽപ്പനയ്ക്കെത്തുന്നത്. വിൽപ്പന തിയ്യതി അടുക്കുന്നതോടെ ഇവയുടെ വില പ്രഖ്യാപിക്കും.
